اسلام آباد ۔ 08 فروری (اے پی پی) صدر مملکت ممنون حسین آکھے جو پاکستان اتے افغانستان کوں انہاں عوامل اُتے تکڑی دید رکھنڑاں ہوسی جیہڑی جو مذموم مقاصد اتے بدنیتی پاروں کشیدگی کوں ہوا ڈیندے پئے ہن اتے نازک معاملیاں اچ پیچیدگی پیدا کرتے غلط فہمیاں ودھاونڑاں چاہندے ہن ۔ میکوں افغان قوم اتے انہاں دی قیادت دی دانشمندی اُتے بھروسہ ہے،ا و ہرطرح دی داخلی تے خارجی سازشاں کوں ناکام بنڑاتے ایں خطے اتے خاص طور تے ڈوہائیں ملکاں اچ ترقی تے خوشحالی دے سفر اچ اہم کردار ادا کریسن۔ پاکستان افغانستان کوں ترقی تے خوشحالی دے موقعے اچ کھلے دل نال شریک کرنڑ دا خواہشمند ہے اتے یقین ہے جو افغان قیادت، عوام اتے خاص طور تے نینگر وقت دی آواز کوں سنڑ تے آپنڑاں تریخی کردار ضرور ادا کریسن۔ او بدھ کوں اتھاں پاک چائنہ فرینڈشپ سنٹر اچ ہائیر ایجوکیشن کمیشن ولوں افغان طلباء کیتے ترائے ہزار سکالر شپس ڈیونڑ بارے تقریب نال خطاب کریندے پئے ہن ۔ صدر مملکت آکھیا جو پاکستان اتے افغانستان وچال تعلقات دی بنیاد صرف جغرافیائی قربت ہی کائنی جڈانجو اے ڈوہائیں اقوام خون، ثقافت، تریخ اتے عقیدے دے رشتے نال گنڈھی ہوئی ہن ۔ انہاں آکھیا جو ایں خطے دے لوکیں دا صبر اتے قربانیاں رنگ گھن امسن ، جیہڑی طرح اوکھے ویلے اچ اساں ہک بئے دا ساتھ ڈتا، توقع ہے جو ڈوہائیں ملک آپنڑیں عوام دی بھلائی اتے بہتری دے سفر اچ وی ہک ڈوجھے دے نال کھڑے ہوسن۔ انہاں آکھیا جو افغان طلبا اتے نینگراں کیتے تعلیمی وظائف شروع کرنڑ دا مقصد اے ہئی جو انہاں کوں وی او تعلیمی سہولتاں اتے موقعے مل سگن جیہڑے جو پاکستان دے بالیں کوں حاصل ہن۔انہاں آکھیا جو اسلامی ملکاں کوں ہک مٹھ تھی گے ہک بئے دے نال تعاون اتے مختلف شعبیاں اچ مہارت دا تبادلہ کرنڑاں چاہیدے ، ایں بارے سائنس و ٹیکنالوجی دے حصول اُتے توجہ رکھیندے ہوئیں مسلم امہ کوںپیش آونڑآلیاں مسلیاں کۖں مشترکہ طور تے حل کرنڑاں چاہیدے ۔ ایں موقعے تے وزیراعظم دے مشیر برائے خارجہ امور سرتاج عزیز خطاب کریندے ہوئیں آکھیا جو افغان طلباء کیتے تکھے بئے ترائے ہزار سکالرشپس ڈتے ویسن۔
