اسلام آباد۔6ستمبر (اے پی پی):وزیراعظم عمران خان آکھیے جو 6ستمبر دا عظیم ݙینھ آپݨے جانبازاں ، شہدا اتے غازیاں کوں خراج تحسین پیش کرݨ دا ݙینھ اے ، قوم کوں آپݨے شہدا تے ہمیشہ فخررہسی جنہاں مادر وطن دے دفاع ، سلامتی اتے تحفظ کیتے آپݨیاں جاناں قربان کیتیاں ، بھارت پاکستان اتے علاقے دے امن کوں ونڄاوݨ دی کوشش کریندا پئے ، ہندوستان اچ اقلیتاں اتے مقبوضہ کشمیر اچ مسلماناں تے ظلم کریندا پئے ، اساݙی امن دی خواہش کوں کمزوری اصلوں نہ سمجھیا ونڄے ، اساݙی بہادر قوم اتے مضبوط مسلح افواج بارہا ثابت کیتے جو اساں دفاع وطن دی بھرپور صلاحیت رکھیندوں تے کہیں وی قسم دی جارحیت نال نبݨݨ کیتے ہر ویلھے تیار اے۔ اے ڳال انہاں یوم ِدفاع وشہدا دے موقع تے آپݨے سنھیے وچ آکھی اے ۔وزیراعظم آکھیے جو زندہ قوماں آزمائشاں توں گزر تے ٻیاں تکڑیاں تھیندن ۔ 1965ء اچ جݙاں دشمن اساݙی آزادی اتے بقا کوں پامال کرݨ دی کوشش کیتی تاں پاکستاننی قوم تکڑی چٹان وانڳݨ اوندے سامݨے ڈٹ ڳئی۔ 6 ستمبر کوں ہندوستان پاکستان تے غیراعلانیہ جنگ مسلط کیتی تاں پوری قوم محافظان وطن دی حمایت اچ اٹھی کھڑی ، ٻہوں سارے لوک نہتے پیدل ہی سرحداں دے پاسے ٹرپئے ، قومی ہم آہنگی اتے یکجہتی دے ایں عظیم مظاہرے اساݙی بہادر مسلح افواج دے جذبیں کوں بیا تکڑا کرݙتا تے او دشمن دے خلاف ݙریے بغیر لڑیے جو دنیا اچ ایندی مثال نی ملدی ، اساݙے بہادر افسراں، نینگراں، پائلٹاں تے سیلرز دنیا تے ثابت کرݙتا جو وطن دے ھک ھک انچ دی حفاظت کیتے ہر ویلھے تیار اے بھاویں ایندی کوئی قیمت چکاوݨی پووے۔ او آپݨی جان دی پروا کیتے بغیر جرات و بہادری ںال لڑیے تے عظیم قربانیاں پیش کریندے ہوئیں دفاع وطن دا فریِضہ نبھاوݨ اچ کامیاب تھئے۔ 6 ستمبر دا عظیم ݙینھ، ہر سال اساکوں آپݨے ہیروز، مسلح افواج دے جانبازاں اتے خاص طور تے انہاں شہیداں تے غازیاں کوں خراج تحسین پیش کرݨ دا موقع ݙیندے ، جیڑھے ہمیشہ توں قوم دی امید اتے فخررہ ڳئن۔
.jpg)
.jpg)
