اوکھ دا ڈٹ تے مقابلہ کرݨ آلیاں قوماں ہی ترقی کرسڳدن ، توقع اے آئی ایم ایف نال معاہدہ اڄوکے مہینے تھی ویسی ،وزیراعظم شہباز شریف دا گرین لائن ریل ڳاݙی سروس دی تقریب توں خطاب
Islamabad: Prime Minister Muhammad Shehbaz Sharif addresses the inaugural ceremony of Greenline Express Train Service (27.01.2023)
اسلام آباد۔27جنوری(اے پی پی) وزیراعظم محمد شہباز شریف آکھیے اوکھ دا ڈٹ تے مقابلہ کرݨ آلیاں قوماں ہی ترقی کریندن ، ملک کوں موجودہ مسئلیں توں کڈھیسوں، توقع اے آئی ایم ایف نال معاہدہ اڄوکے مہینے تھی ویسی ۔ گزریل حکومت دی طرفوں اداریں تے بے بنیاد الزام تراشی تے چینی کمپنیاں تے کرپشن دے الزامات نال چینی حکام کوں تکلیف پڄی ، انہاں تعلقات کوں معمول تے گھن آوݨ کیتے برف پگھلدی پئی اے ، ایم ایل ۔ون منصوبہ دی تکمیل ساݙی اولین ترجیح اے ، ݙینھ رات محنت کرتے دنیا اچ آپݨا ونڄا مقام حاصل کریسوں ، پوری دنیا اچ حکومتاں گورننس دی ذمہ وار ہن او ادارے نی چلیندیاں ،اساں زرمبادلہ دے ذخائر کوں سامݨے رکھ تے آپݨی ترجیحات دا تعین کیتے ۔ جمعہ کوں وزیراعظم محمد شہباز شریف گرین لائن ریل ڳاݙی دا افتتاح کیتا ۔ ایں موقع تے وزیر ریلوے خواجہ سعد رفیق، وزیر خزانہ سینیٹر اسحاق ڈار، وزیر منصوبہ بندی پروفیسر احسن اقبال وی خطاب کیتا ۔ وزیراعظم تقریب توں خطاب کریندے ہوئیں آکھیے جو گرین لائن جیں دی بنیاد نواز شریف دے گزریل دور اچ رکھی ڳئی ہئی تے بدقسمتی نال بے شمار ٻئے منصوبیں وانڳوں اے منصوبہ وی بعد دی حکومت اچ دم تروڑ ڳیا اساں ایں سروس دا نویں سروں اجرا کرݨ تے اللہ تعالیٰ دا شکر ادا کریندوں تے وزیر ریلوے تے چینی کمپنیاں کوں مبارخ ݙیندوں ۔ وزیر اعظم آکھیے حالی ویگنز دا معائنہ کیتے اے جدید سہولتاں نال آٓراستہ ہن ، وزیر ریلوے آئوٹ سورسنگ تے یقین رکھیندن تے دور حاضر اچ ترقی دا زینہ ایہو اے ایں توں ریلوے اچ بہتری آسی پاکستان ریلوے کوں فیدہ تھیسی ۔ انہاں آکھیے حکومتاں دا کم ادارے چلاوݨ نی بلکہ گورننس ہوندے ۔ انہاں آکھیے حکومتاں آندیاں ویندیاں رہ ویندن پاکستان ایں او جاہ تے کھڑے جتھاں ھک ھک پائی بچاوݨ دی کوشش کریندے پیوں ۔ اساکوں آپݨے پیراں تے کھڑا تھیوݨ کیتے ایں روش کوں بدلݨا ہوسی ، محنت کوں آپݨا شعار بݨاوݨاں ہوسی ، اساں کݙاں تئیں ݙوجھیں تے سہارے تے رہسوں ۔اے سفر اوکھا ضرور اے لیکن اساں ݙینھ رات محںت کرتے ملک کوں اڳوں ودھیسوں تے آپݨا ونڄا مقام ولا گھنسوں ۔
.jpg)
